ഇന്നത്തെ കാലത്ത് ധനകാര്യ മേഖലയിൽ വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നത്. വിപണിയുടെ പ്രവർത്തനത്തേയും നിക്ഷേപം കൈകാര്യം ചെയ്യപ്പെടുന്ന രീതിയേയും ഈ മാറ്റങ്ങൾ വലിയ നിലയിൽ സ്വാധീനിച്ചിട്ടുണ്ട്. മ്യൂച്വൽ ഫണ്ട് കമ്പനികൾ തമ്മിലുള്ള ലയനങ്ങളും ഏറ്റെടുക്കലുകളും മേൽപ്പറഞ്ഞ മാറ്റങ്ങളിൽ ചിലതാണ്. മ്യൂച്വൽ ഫണ്ടുകളുടെ ലയനങ്ങളും ഏറ്റെടുക്കലുകളും നിക്ഷേപകരെ എങ്ങനെയാണ് സ്വാധീനിക്കുന്നതെന്ന് മനസ്സിലാക്കുവാൻ ശ്രമിക്കാം.
മ്യൂച്വൽ ഫണ്ടുകളുടെ ലയനങ്ങളും ഏറ്റെടുക്കലുകളും
ഒരു മ്യൂച്വൽ ഫണ്ട് കമ്പനി മറ്റൊരു കമ്പനിയുമായി ലയിക്കുക അല്ലെങ്കിൽ ഒരു മ്യൂച്വൽ ഫണ്ട് കമ്പനി മറ്റൊന്നിനെ ഏറ്റെടുക്കുക മുതലായ നടപടികളുമായി ബന്ധപ്പെട്ട വാർത്തകൾ പലപ്പോഴും നാം കേൾക്കാറുണ്ട്. മ്യൂച്വൽ ഫണ്ട് കമ്പനികൾ തമ്മിലുള്ള ലയനത്തിനും ഏറ്റെടുക്കലുകൾക്കും പല കാരണങ്ങൾ ഉണ്ടായിരിക്കും.
ചില സാഹചര്യങ്ങളിൽ ചില കമ്പനികൾ അവരുടെ വിപണി വിഹിതം വർദ്ധിപ്പിക്കുക എന്ന ലക്ഷ്യം മുൻനിർത്തി ലയനത്തിന് ശ്രമിക്കാറുണ്ട്. ലയനത്തിലൂടെ കൂടുതൽ നിക്ഷേപകർ ഒരു കുടക്കീഴിൽ എത്തുകയാണ് ചെയ്യുന്നത്. രണ്ട് ഫണ്ടുകൾ ഒന്നായി ചേർന്ന് പ്രവർത്തിക്കുമ്പോൾ ഫണ്ട് കൈകാര്യം ചെയ്യുവാൻ ആവശ്യമായ തുകയിൽ കാര്യമായ കുറവുണ്ടാകുന്നു. കൂടുതൽ വിഭവങ്ങളും കൂടുതൽ വൈദഗ്ധ്യവും സാമാഹരിക്കുന്നതിലൂടെ ഫണ്ടിന്റെ മൊത്തം പ്രകടനത്തിൽ കാര്യമായ പുരോഗതി കൈവരിക്കുവാനാകുന്നു.
ലയനത്തിന്റെ ഭാഗമാകുന്ന കമ്പനികളുടെ പ്രവർത്തനത്തിൽ വലിയ മാറ്റങ്ങളാണ് സംഭവിക്കുന്നത്. ഫണ്ടിന്റെ ഘടന, ഫണ്ട് മാനേജ്മെൻ്റ് ടീം, നിക്ഷേപ തന്ത്രങ്ങൾ എന്നിവയിൽ എല്ലാം മാറ്റങ്ങൾ പ്രകടമായിരിക്കും.
മ്യൂച്വൽ ഫണ്ടുകളുടെ ലയനങ്ങളും ഏറ്റെടുക്കലുകളും നിക്ഷേപകരെ എങ്ങനെയാണ് ബാധിക്കുന്നത്.
വൈവിധ്യവൽക്കരണം
ലയനങ്ങളിലൂടെയും ഏറ്റെടുക്കലുകളിലൂടെയും കൂടുതൽ വൈവിധ്യമാർന്ന പോർട്ട്ഫോളിയോ സൃഷ്ടിക്കുവാനുള്ള സാഹചര്യം ഉണ്ടാകുന്നു. രണ്ട് ഫണ്ടുകൾ ഒന്നിക്കുമ്പോൾ അവയുമായി ബന്ധപ്പെട്ട ആസ്തികളും ഒന്നാകുന്നതിനാൽ തന്നെ നിക്ഷേപവുമായി ബന്ധപ്പെട്ട് കൂടുതൽ വൈവിധ്യവൽക്കരണം നടക്കുന്നു.
നിക്ഷേപം പല മേഖലകളിലേക്ക് വ്യാപിപ്പിക്കാനുള്ള അവസരം ഇവിടെ ലഭ്യമാകുന്നുണ്ട്. ഉദാഹരണത്തിന് ആഭ്യന്തര ഓഹരി വിപണിയിൽ നിക്ഷേപിക്കുന്ന ഒരു ഫണ്ടും വിദേശ ഓഹരി വിപണിയിൽ നിക്ഷേപിക്കുന്ന ഒരു ഫണ്ടും തമ്മിൽ ലയനം നടക്കുന്നതിലൂടെ കൂടുതൽ മേഖലകളിലേക്ക് നിക്ഷേപം എത്തിച്ചേരുവാനുള്ള അവസരം ഉണ്ടാകുന്നു.
വൈവിധ്യവൽക്കരണം നിങ്ങളുടെ നിക്ഷേപത്തിന്റെ സുരക്ഷിതത്വം വർദ്ധിപ്പിക്കുകയാണ് ചെയ്യുന്നത്. വ്യത്യസ്ത സ്വഭാവമുള്ള ആസ്തികളിലായി നിക്ഷേപം വ്യാപിപ്പിക്കുന്നത് റിസ്ക് ലഘൂകരിക്കുവാൻ സഹായകരമാകുന്ന നടപടിയാണ്. ഒരു വിഭാഗം ആസ്തികളിൽ നിന്ന് വിചാരിച്ചത്ര നേട്ടം ലഭ്യമായില്ലെങ്കിൽ പോലും മറ്റ് ആസ്തികൾ മികച്ച നേട്ടം നൽകുമ്പോൾ ഫണ്ടിന്റെ സന്തുലിതാവസ്ഥ നിലനിർത്തുവാനും ദീർഘകാലാടിസ്ഥാനത്തിൽ തെറ്റില്ലാത്ത നേട്ടം സ്വന്തമാക്കാനും സാധിക്കുന്നു.
മെച്ചപ്പെട്ട പ്രകടനം
മ്യൂച്വൽ ഫണ്ടുകൾ തമ്മിൽ ലയിപ്പിക്കുന്നതിന്റെ ഏറ്റവും വലിയ ഗുണം കൂടുതൽ മികച്ച പ്രകടനം ലഭ്യമാകുന്നു എന്നതാണ്. മൂലധനം, ഗവേഷണ പദ്ധതികൾ തുടങ്ങി എല്ലാ വിഭവങ്ങളും ഒത്തുചേരുമ്പോൾ ഫലപ്രദമായ നിക്ഷേപ തന്ത്രങ്ങൾ തയ്യാറാക്കുവാനുള്ള അവസരമാണ് ലഭിക്കുന്നത്.
അനുഭവ സമ്പത്തുള്ള പ്രൊഫഷണലുകൾക്ക് ഒത്തുചേർന്ന് പ്രവർത്തിക്കുവാൻ ആകുന്നതിലൂടെ കൂടുതൽ മികച്ച സേവനം നിക്ഷേപകർക്ക് ലഭ്യമാകുന്നു. ശക്തമായ ഒരു മാനേജ്മെൻ്റ് ടീമിന് വിപണിയിലെ വ്യത്യസ്ത സാഹചര്യങ്ങളിൽ ക്രിയാത്മകമായ ഇടപെടലുകൾ നടത്തുവാൻ ആകും. പല വ്യക്തികളുടേയും വൈദഗ്ധ്യം ഒരു ലക്ഷ്യത്തിനായി ഉപയോഗിക്കപ്പെടുമ്പോൾ അതിനനുസരിച്ചുള്ള ഗുണപരമായ മുന്നേറ്റം ഫണ്ടിന്റെ പ്രകടനത്തിൽ ഉണ്ടാകുന്നു.
ചെലവ് കുറയുന്നു
സർവ്വീസ് പ്രൊവൈഡർമാരിൽ നിന്ന് കൂടുതൽ ലാഭത്തിൽ സേവനങ്ങൾ സ്വീകരിക്കുവാൻ വലിയ ഫണ്ടുകൾക്ക് അവസരമുണ്ട്. സാങ്കേതിക സഹായത്തിനും കാര്യനിർവ്വഹണത്തിനും ഈടാക്കുന്ന തുകയിൽ കൂടുതൽ ഇളവുകൾ ആവശ്യപ്പെടുവാൻ വലിയ കമ്പനികൾക്ക് സാധിക്കും.
ഫണ്ടിന്റെ നടത്തിപ്പ് ചെലവുകൾ കുറയ്ക്കുവാനാകുന്നത് നിക്ഷേപകർക്ക് കൂടുതൽ നേട്ടം നേടുവാനുള്ള അവസരം നൽകും. നിക്ഷേപകരിൽ നിന്നും ഈടാക്കുന്ന ഫീസ് കുറയുന്നതിലൂടെ നിക്ഷേപകരുടെ ആകെ നേട്ടത്തിൽ വർദ്ധനവ് ഉണ്ടാകുന്നു.
പുതിയ അവസരങ്ങൾ ലഭ്യമാകുന്നു
ലയനത്തിലൂടെയും ഏറ്റെടുക്കലിലൂടെയും നിങ്ങൾ നേരത്തെ നിക്ഷേപം നടത്തിയ ഫണ്ടിൽ ലഭ്യമല്ലാത്ത വിപണിയിലേക്ക് കൂടി നിക്ഷേപം വ്യാപിപ്പിക്കുവാൻ നിങ്ങൾക്കാകും. വ്യത്യസ്ത വിപണികളിലേക്കും മേഖലകളിലേക്കും നിക്ഷേപം എത്തിച്ചേരുമ്പോൾ കൂടുതൽ വളർച്ച നേടുവാനുള്ള സാഹചര്യം ഉണ്ടാകുന്നു.
രണ്ട് ഫണ്ടുകളിൽ നിന്നുള്ള വിദഗ്ധരുടെ സഹായത്താൽ പുതിയ ട്രെൻഡുകൾ മനസ്സിലാക്കി വിപണിയിൽ നിന്ന് പരമാവധി നേട്ടം നേടുവാനാകും. ഇതിലൂടെ നിങ്ങളുടെ പോർട്ട്ഫോളിയോയുടെ വളർച്ച ശേഷിയിൽ കാര്യമായ വർദ്ധനവ് ഉണ്ടാകുന്നു.
നിങ്ങൾക്ക് എന്തെല്ലാം ചെയ്യാനാകും
നിക്ഷേപത്തെ സംബന്ധിക്കുന്ന വിവരങ്ങൾ കൃത്യമായി അറിയുക
ഒരു നിക്ഷേപകൻ എന്ന നിലയിൽ നിങ്ങളുടെ നിക്ഷേപത്തെ സംബന്ധിക്കുന്ന എല്ലാ വിവരങ്ങളും നിങ്ങൾ തീർച്ചയായും അറിഞ്ഞിരിക്കണം. മ്യൂച്വൽ ഫണ്ടുകളുടെ ലയനങ്ങളേയും ഏറ്റെടുക്കലുകളേയും സംബന്ധിച്ച വാർത്തകൾ പ്രത്യേകം ശ്രദ്ധിക്കുവാൻ ശ്രമിക്കുക. ധനകാര്യ വാർത്തകളും മ്യൂച്വൽ ഫണ്ടുകളുടെ റിപ്പോർട്ടുകളും വായിക്കുവാൻ സമയം കണ്ടെത്തുക.
നിങ്ങൾ നിക്ഷേപം നടത്തിയ ഫണ്ട് മറ്റൊരു ഫണ്ടുമായി ലയിക്കുവാൻ തയ്യാറെടുക്കുകയാണെങ്കിൽ അതിന് പിന്നിലെ കാരണം കണ്ടെത്തുക. നിങ്ങൾ നിക്ഷേപം നടത്തിയിരിക്കുന്ന മ്യൂച്വൽ ഫണ്ടിൽ സംഭവിക്കുന്ന ഓരോ മാറ്റങ്ങളും നിങ്ങൾക്ക് ലഭിക്കേണ്ട നേട്ടത്തിനെ നേരിട്ട് സ്വാധീനിക്കുന്ന കാര്യങ്ങളാണ്.
പുതിയ ഫണ്ടിനെ വിലയിരുത്തുക
ലയനത്തിന് ശേഷം പുതിയ സ്വഭാവം കൈവരിക്കുന്ന മ്യൂച്വൽ ഫണ്ടിനെ തീർച്ചയായും ആഴത്തിൽ വിലയിരുത്തേണ്ടതുണ്ട്. പുതിയ ഫണ്ടിന്റെ നിക്ഷേപ തന്ത്രങ്ങൾ നിങ്ങളുടെ സാമ്പത്തിക ലക്ഷ്യങ്ങളുമായി പൊരുത്തപ്പെടുന്നുണ്ടെന്ന് ഉറപ്പുവരുത്തുക. കൂടാതെ മ്യൂച്വൽ ഫണ്ട് കൈകാര്യം ചെയ്യുന്ന മാനേജ്മെൻ്റ് ടീമിന്റെ പ്രാഗല്ഭ്യം മനസ്സിലാക്കി നിങ്ങളുടെ സാമ്പത്തിക ലക്ഷ്യങ്ങളിലേക്ക് നിങ്ങളെ എത്തിക്കുവാൻ ശേഷിയുള്ളവരാണോ മാനേജ്മെന്റ് ടീമിൽ ഉള്ളതെന്ന് പരിശോധിക്കുക.
പുതിയ ഫണ്ടുമായി ബന്ധപ്പെട്ട റിസ്ക്കാണ് അടുത്തതായി പരിഗണിക്കേണ്ട വിഷയം. ഫണ്ടിന്റെ റിസ്ക് ലെവലിൽ വരുന്ന മാറ്റം നിങ്ങൾക്ക് ഉൾക്കൊള്ളാൻ സാധിക്കുന്നതായിരിക്കണം. ഒരുപക്ഷേ പുതിയ ഫണ്ടിന്റെ റിസ്ക് ലെവൽ നിങ്ങൾക്ക് അനുയോജ്യമല്ലെങ്കിൽ മറ്റൊരു ഫണ്ടിലേക്ക് നിക്ഷേപം മാറ്റുന്നതിനെക്കുറിച്ച് ചിന്തിക്കുക.
പോർട്ട്ഫോളിയോയുടെ സന്തുലിതാവസ്ഥ നിലനിർത്തുക
നിങ്ങളുടെ നിക്ഷേപ തന്ത്രവുമായി പുതിയ ഫണ്ട് പൊരുത്തപ്പെടുന്നില്ലെങ്കിൽ പോർട്ട്ഫോളിയയുടെ സന്തുലിതാവസ്ഥ നിലനിർത്തുവാനുള്ള നടപടികൾ കൈക്കൊള്ളുക. നിങ്ങളുടെ സാമ്പത്തിക ലക്ഷ്യങ്ങളേയും നിങ്ങൾക്ക് കൈക്കൊള്ളാനാകുന്ന റിസ്കിനെയും പരിഗണിച്ച് നിങ്ങളുടെ പോർട്ട്ഫോളിയോയിൽ മാറ്റങ്ങൾ കൊണ്ടുവരണം. ഉദാഹരണത്തിന് നിങ്ങൾക്ക് താല്പര്യമുള്ള മേഖലയിൽ പുതിയ മ്യൂച്വൽ ഫണ്ട് നിക്ഷേപം നടത്തുന്നില്ലെങ്കിൽ അനുയോജ്യമായ മറ്റൊരു ഫണ്ടിലേക്ക് പണം മാറ്റി നിക്ഷേപിക്കുവാൻ തയ്യാറാവുക.
ലയനത്തിന് ശേഷം വ്യത്യസ്ത സ്വഭാവമുള്ള ആസ്തികൾ പുതിയ ഫണ്ടിന്റെ ഭാഗമായിരിക്കും. അതിനാൽ തന്നെ പോർട്ട്ഫോളിയോയിൽ പരിഷ്കരണം വരുത്തേണ്ടത് അനിവാര്യമായ നടപടിയാണ്.
പ്രൊഫഷണൽ സഹായം തേടുക
ഒരു ഫണ്ടിന്റെ പ്രകടനം വിലയിരുത്തുവാനും ഫണ്ടുമായി ബന്ധപ്പെട്ട റിസ്ക് എത്രത്തോളമാണെന്ന് മനസ്സിലാക്കുവാനുമുള്ള വൈദഗ്ധ്യം ധനകാര്യ വിദഗ്ധർക്കുണ്ട്. അതുകൊണ്ടു തന്നെ ഇത്തരം സാഹചര്യങ്ങളിൽ പ്രൊഫഷണൽ സഹായം തേടുക എന്നത് വളരെ പ്രധാനപ്പെട്ട കാര്യമാണ്. മ്യൂച്വൽ ഫണ്ടിൽ വരുന്ന മാറ്റങ്ങൾ നിങ്ങളുടെ നിക്ഷേപത്തെ എങ്ങനെയാണ് ബാധിക്കുന്നതെന്ന് മനസ്സിലാക്കുവാൻ ധനകാര്യ വിദഗ്ധർ നിങ്ങളെ സഹായിക്കും.
Are you looking for investments?
Kashly team can help you start your mutual fund investments with the right assistance. signup here
മ്യൂച്വൽ ഫണ്ടുകളുടെ ലയനം മൂലം നിങ്ങളുടെ നിക്ഷേപത്തിൽ സംഭവിക്കുന്ന മാറ്റം നിങ്ങളുടെ പദ്ധതികളുമായി ഒത്തു പോകുന്നില്ലെങ്കിൽ എങ്ങനെ നിക്ഷേപം ക്രമീകരിക്കണമെന്നതിനെ സംബന്ധിച്ച് വ്യക്തമായ ധാരണ നൽകുവാൻ ഒരു ധനകാര്യ വിദഗ്ധന് സാധിക്കും.
സംഗ്രഹം
മ്യൂച്വൽ ഫണ്ടുകളുടെ കമ്പനികൾ തമ്മിലുള്ള ലയനവും കമ്പനികളുടെ ഏറ്റെടുക്കലും നിക്ഷേപകരെ എങ്ങനെയാണ് ബാധിക്കുന്നതെന്ന് തിരിച്ചറിയേണ്ടത് വളരെ പ്രധാനപ്പെട്ട കാര്യമാണ്. മ്യൂച്വൽ ഫണ്ടുകളിൽ മേൽപ്പറഞ്ഞ രീതിയിലുള്ള മാറ്റങ്ങൾ സംഭവിക്കുമ്പോൾ നിക്ഷേപകരെ സംബന്ധിച്ച് പല നേട്ടങ്ങളും പ്രശ്നങ്ങളും ഉയർന്നുവരുന്നുണ്ട്. വിവരങ്ങൾ കൃത്യമായി മനസ്സിലാക്കുന്നതിലൂടെയും കൃത്യമായ സമയത്ത് നടപടികൾ കൈക്കൊള്ളുന്നതിലൂടെയും ഈ മാറ്റങ്ങളെ മികച്ച രീതിയിൽ കൈകാര്യം ചെയ്യുവാൻ നിങ്ങൾക്ക് സാധിക്കും.
