ബുദ്ധിപരമായി പണം ചെലവഴിച്ചുകൊണ്ട് പരമാവധി മൂല്യം എന്നതാണ് സാമ്പത്തികമായ മിതവ്യയ ശീലം പാലിക്കുന്നതിന്റെ ശരിയായ ലക്ഷ്യം. നിത്യജീവിതത്തിൽ അനാവശ്യമായി പിശുക്ക് കാണിക്കുമ്പോൾ പലപ്പോഴും നിലവാരം കുറഞ്ഞ വസ്തുക്കളാണ് നമുക്ക് ലഭ്യമാവുന്നത്. വളരെ ചിന്തിച്ച് ഗുണപരമായ രീതിയിൽ പണം ചെലവഴിക്കുവാനും അതുവഴി ദീർഘകാല അടിസ്ഥാനത്തിൽ നേട്ടം നേടാനുമാണ് നാം മിതവ്യയ ശീലം പാലിക്കേണ്ടത്. എന്നാൽ പിശുക്ക് കാണിച്ച് സാധനങ്ങൾ വാങ്ങുമ്പോൾ അവ ഈട് നിൽക്കാതെ വരികയും നമുക്ക് കൂടുതൽ നഷ്ടം സംഭവിക്കുകയും ചെയ്യുന്നു. നിത്യജീവിതത്തിൽ മിതവ്യയ ശീലം പാലിക്കുന്നതിന്റെ ചില ഗുണങ്ങളാണ് ഇവിടെ പരിശോധിക്കുന്നത്.
പിശുക്കും മിതവ്യയവും
ഉപഭോഗ സംസ്കാരത്തിൽ അധിഷ്ഠിതമായ ജീവിതരീതി മേധാവിത്വം പുലർത്തുന്ന ഇന്നത്തെ ലോകത്ത് പിശുക്ക് മിതവ്യയം എന്ന രണ്ടു പദങ്ങൾ പലപ്പോഴും ഒരേ അർത്ഥത്തിലാണ് പലരും മനസ്സിലാക്കുന്നത്. എന്നാൽ ഇവ തീർത്തും വ്യത്യസ്തമായ രണ്ടു പദങ്ങളാണ്.
പിശുക്കും മിതവ്യയവും തമ്മിലുള്ള വ്യത്യാസം മനസ്സിലാക്കിയിരിക്കേണ്ടത് വളരെ പ്രധാനപ്പെട്ട കാര്യമാണ്. നിങ്ങളുടെ ജീവിതലക്ഷ്യങ്ങൾക്ക് അനുസൃതമായ മികച്ച തീരുമാനങ്ങൾ കൈക്കൊള്ളുവാൻ ഈ തിരിച്ചറിവ് നിങ്ങളെ സഹായിക്കും.
ഉപകരണങ്ങളുടെ പ്രവർത്തനക്ഷമത, വിഭവങ്ങളുടെ പരമാവധി ഉപയോഗം മുതലായ ലക്ഷ്യങ്ങൾ മുൻനിർത്തിയുള്ള ജീവിത രീതിയാണ് മിതവ്യയ ശീലത്തിന്റെ ഭാഗമായി പിന്തുടരേണ്ടത്. അതായത് നിങ്ങൾ ചെലവഴിക്കുന്ന ഓരോ രൂപയ്ക്കും പരമാവധി മൂല്യം നിങ്ങൾക്ക് ലഭിക്കേണ്ടതുണ്ട്. ഏതെങ്കിലും ഒരു വസ്തു സ്വന്തമാക്കേണ്ട സാഹചര്യമുണ്ടാകുമ്പോൾ മിതവ്യയ ശീലം പാലിക്കുന്ന വ്യക്തികൾ ലാഭകരമായ വിലയും ഉയർന്ന ഗുണമേന്മയും ഉറപ്പുവരുത്തുവാൻ ശ്രമിക്കുന്നു.
ദീർഘകാല അടിസ്ഥാനത്തിലുള്ള അനന്തരഫലങ്ങളെ കുറിച്ച് ചിന്തിക്കാതെ പെട്ടെന്നുള്ള ലാഭം മുൻനിർത്തിയാണ് പലരും ജീവിതത്തിൽ പിശുക്ക് കാണിക്കുന്നത്. നിങ്ങൾ പിശുക്കിന്റെ പാതയാണ് തിരഞ്ഞെടുക്കുന്നതെങ്കിൽ ഈട് നിൽക്കുന്ന ഗുണമേന്മയുള്ള ഉൽപ്പന്നങ്ങൾക്ക് പകരം കുറഞ്ഞവിലയ്ക്ക് സാധനങ്ങൾ സ്വന്തമാക്കുക എന്നതിനു മാത്രമായിരിക്കും നിങ്ങൾ പ്രാധാന്യം നൽകുന്നത്.
എന്തുകൊണ്ടാണ് മിതവ്യയ ശീലം മികച്ചതാകുന്നത്
മികച്ച വിലയിൽ ഉയർന്ന ഗുണമേന്മ ലഭ്യമാകുന്നു
മിതവ്യയ ശീലം പാലിക്കുക എന്നാൽ എല്ലാത്തരം ചെലവുകളും ഒഴിവാക്കുക എന്നല്ല അർത്ഥമാക്കുന്നത്. മറിച്ച് ഗുണമേന്മയും വിലയും തമ്മിൽ ഒരു സന്തുലിതാവസ്ഥയിൽ എത്തിച്ചേരുക എന്നതാണ്.
വിലകുറഞ്ഞ നിലവാരമില്ലാത്ത വസ്തുക്കൾ പലപ്പോഴും ഈട് നിൽക്കാറില്ല. അതുകൊണ്ടു തന്നെ അത്തരം വസ്തുക്കൾ സ്വന്തമാക്കുന്നത് താൽക്കാലിക ആശ്വാസം മാത്രമായിരിക്കും. നീണ്ടകാലയളവ് പരിഗണിക്കുമ്പോൾ പല തവണകളായി കൂടുതൽ തുക നിങ്ങൾക്ക് ചെലവഴിക്കേണ്ടി വന്നേക്കാം. മാത്രമല്ല നിലവാരമില്ലാത്ത ഉൽപ്പന്നങ്ങൾ ഉപയോഗിക്കുമ്പോൾ നിങ്ങളുടെ ജീവിതത്തിൽ അതിൻ്റെതായ ബുദ്ധിമുട്ടുകൾ കടന്നുവരുവാൻ സാധ്യതയുണ്ട്. ഗുണമേന്മ പരിഗണിക്കാതെ വിലക്കുറവ് മാത്രം മുൻനിർത്തി സാധനങ്ങൾ സ്വന്തമാക്കുമ്പോൾ പല സാഹചര്യങ്ങളിലും പ്രായോഗിക തലത്തിൽ നിങ്ങൾക്ക് സംതൃപ്തി ലഭിക്കുകയില്ല.
എന്നാൽ നിങ്ങൾ മിതവ്യയവ ശീലം പാലിക്കുന്ന വ്യക്തിയാണെങ്കിൽ ഒരല്പം പണം കൂടുതൽ ചെലവഴിച്ചാലും വിപണിയിൽ നിന്ന് മികച്ച ഉത്പന്നമായിരിക്കും നിങ്ങൾ സ്വന്തമാക്കുക. മുടക്കിയ പണത്തിന് നീണ്ടകാലയളവിൽ കാര്യക്ഷമമായ പ്രവർത്തനം ലഭ്യമാകുമ്പോൾ ഇടയ്ക്കിടെ അനാവശ്യമായി പണം ചെലവഴിക്കുന്നത് ഒഴിവാക്കാൻ സാധിക്കുന്നു.
ദീർഘകാലാടിസ്ഥാനത്തിലുള്ള നീക്കിയിരിപ്പുകൾക്ക് പ്രാധാന്യം നൽകുന്നു
മിതവ്യയ ശീലത്തിൽ ലക്ഷ്യം വെക്കേണ്ടത് ദീർഘകാല അടിസ്ഥാനത്തിലുള്ള നേട്ടത്തിനാണ്. നിങ്ങൾക്ക് ഇന്ന് വളരെ ശ്രദ്ധിച്ചു പണം ചെലവാക്കുവാനായാൽ നല്ല നാളുകൾക്കായി ആവശ്യമുള്ള നീക്കിയിരിപ്പ് സൃഷ്ടിച്ചെടുക്കുവാൻ നിങ്ങൾക്ക് സാധിക്കും.
വിശ്വാസ്യതയും മൂല്യവുമുള്ള കാര്യങ്ങൾക്കായി പണം നീക്കിവെക്കുന്നത് വഴി നിങ്ങൾക്ക് ശക്തമായ സാമ്പത്തിക അടിത്തറ സൃഷ്ടിച്ചെടുക്കുവാനാകും. നിങ്ങളുടെ ചെലവുകളെ കൃത്യമായി കൈകാര്യം ചെയ്താൽ മ്യൂച്വൽ ഫണ്ടുകൾ പോലെയുള്ള നിക്ഷേപങ്ങൾക്ക് കൂടുതൽ പണം കണ്ടെത്തുവാൻ നിങ്ങൾക്ക് സാധിക്കും.
അനാവശ്യമായ പിശുക്ക് നിക്ഷേപ സാധ്യതകൾ ഇല്ലാതാക്കുകയാണ് ചെയ്യുന്നത്. പിശുക്കന്മാരായി ജീവിക്കുന്ന വ്യക്തികൾക്ക് മികച്ച സാമ്പത്തിക തീരുമാനങ്ങൾ കൈക്കൊള്ളുവാനും സമാധാനപൂർണ്ണമായ ജീവിതം നയിക്കുവാനും പലപ്പോഴും സാധിക്കാറില്ല.
ഗുണമേന്മ നഷ്ടപ്പെടുത്താതെ
പരമാവധി മൂല്യം ലഭിക്കുവാൻ
വളരെ ബോധപൂർവ്വം ചിന്തിച്ച് പണം ചെലവഴിക്കുവാനുള്ള മനോഭാവമാണ് മിതവ്യയ ശീലം നിങ്ങൾക്ക് പകർന്നു നൽകുന്നത്. പണം ചെലവഴിക്കുന്നതുമായി ബന്ധപ്പെട്ട് സ്മാർട്ടായ തീരുമാനങ്ങൾ എടുക്കുവാനും ആ തീരുമാനങ്ങൾ നിങ്ങളുടെ ഭാവി ജീവിതത്തെ എങ്ങനെയാണ് സ്വാധീനിക്കുന്നതെന്ന് മനസ്സിലാക്കുവാനും കഴിഞ്ഞാൽ മാത്രമേ ദീർഘകാലാടിസ്ഥാനത്തിൽ നിങ്ങളുടെ ജീവിതം മെച്ചപ്പെടുകയുള്ളൂ.
എടുത്തുചാടി പണം ചെലവാക്കുന്നതിനു പകരം ഒരു ഉൽപ്പന്നത്തിന്റെ പ്രായോഗിക തലത്തിലുള്ള ഉപയോഗത്തിനാണ് പ്രാധാന്യം നൽകേണ്ടത്. ഏതൊരു വസ്തുവിന് വേണ്ടി പണം ചെലവഴിക്കുമ്പോഴും ആ വസ്തു നിങ്ങളുടെ ജീവിതത്തിൽ എന്തെല്ലാം മാറ്റങ്ങളാണ് കൊണ്ടുവരുന്നതെന്ന് മുൻകൂട്ടി കാണുവാൻ ശ്രമിക്കണം. ഓരോ കാര്യങ്ങളിലും സാമ്പത്തിക അച്ചടക്കം പാലിക്കുവാൻ കഴിഞ്ഞാൽ ഏതൊരു സാമ്പത്തിക പ്രതിസന്ധിയും നേരിടുവാനുള്ള സാഹചര്യം വളർത്തിയെടുക്കുവാൻ നിങ്ങൾക്ക് കഴിയും.
ശക്തമായ സാമ്പത്തിക അടിത്തറ സൃഷ്ടിക്കുവാൻ
മിതവ്യയം പാലിക്കുന്ന ജീവിതരീതി പിന്തുടർന്നുകൊണ്ട് ദീർഘകാല അടിസ്ഥാനത്തിലുള്ള നീക്കിയിരിപ്പുകൾ സൃഷ്ടിക്കുവാനായാൽ നിങ്ങളുടെ അടിത്തറ ശക്തമായിരിക്കും. അപ്രതീക്ഷിതമായി ജീവിതത്തിൽ കടന്നു വരുന്ന ചെലവുകൾ നേരിടുവാൻ ഭാവിയിലേക്കുള്ള നീക്കിയിരിപ്പുകൾ നിങ്ങളെ സഹായിക്കുന്നു.
ജീവിതത്തിൽ എന്തുതന്നെ സംഭവിച്ചാലും ആ മാറ്റങ്ങൾക്കായി സാമ്പത്തികമായി തയ്യാറായിരിക്കേണ്ടതുണ്ട്. തന്ത്രപരമായി ചിന്തിച്ച് പണം ചെലവഴിക്കുവാൻ തയ്യാറാകുന്നതിലൂടെ നിങ്ങളുടെ സാമ്പത്തിക അടിത്തറ മെച്ചപ്പെടുവാനുള്ള സാഹചര്യം ഉണ്ടാകുന്നു.
ഉയർന്ന ജീവിത നിലവാരം ഉറപ്പുവരുത്തുവാൻ
നിങ്ങൾ പണം ചെലവഴിച്ച് സ്വന്തമാക്കുന്ന വസ്തുവകകൾ നിങ്ങളുടെ ജീവിതം മെച്ചപ്പെടുത്തുമ്പോൾ തന്നെ, പണം സൂക്ഷ്മമായി ചെലവാക്കുന്നതിലൂടെ ലഭിക്കുന്ന തുക നിങ്ങൾക്ക് ഭാവിയിലേക്കുള്ള നിക്ഷേപമായി മാറ്റുവാൻ കഴിയുന്നു. ഇന്ന് നിങ്ങൾ അച്ചടക്കത്തോടെ ജീവിക്കുന്നതിന്റെ ഗുണഫലം ലഭിക്കുന്നത് മുന്നോട്ടുള്ള ജീവിതത്തിലായിരിക്കും.
സംതൃപ്തിയോടെ ജീവിക്കുന്നതിനോടൊപ്പം നിങ്ങൾ കൈക്കൊള്ളുന്ന ചെറിയ നടപടികളിലൂടെ ഉയർന്ന ജീവിത നിലവാരമുള്ള ഒരു ജീവിത രീതി ഉറപ്പുവരുത്തുവാൻ നിങ്ങൾക്കാകുന്നു.
സംഗ്രഹം
പണം വളരെ ശ്രദ്ധിച്ച് ഉപയോഗിക്കുന്നതിനെക്കുറിച്ച് ചിന്തിക്കുന്ന അവസരത്തിൽ അനാവശ്യമായി പിശുക്ക് കാണിക്കുക എന്നതിലുപരി മിതവ്യയ ശീലം പാലിക്കുന്ന ജീവരീതി തിരഞ്ഞെടുക്കുവാനാണ് നിങ്ങൾ ശ്രമിക്കേണ്ടത്. എന്തുകൊണ്ട് മിതവയ ശീലം മികച്ചതാകുന്നു എന്ന് മനസ്സിലാക്കുക. നിത്യജീവിതത്തിൽ ഓരോ സാഹചര്യങ്ങൾക്കും അനുസൃതമായി മിതവ്യയം പാലിക്കുവാൻ തയ്യാറാവുക. ശ്രദ്ധയോടെ പണം ചെലവഴിക്കുമ്പോൾ തന്നെ മികച്ച തിരഞ്ഞെടുപ്പുകൾ നടത്തുവാൻ നിങ്ങൾക്ക് സാധിക്കുന്നുണ്ടെന്ന് ഉറപ്പുവരുത്തുക.
