ഭൂരിഭാഗം വ്യക്തികൾക്കും റിട്ടയർമെന്റ് ആസൂത്രണം ചെയ്യുക എന്നത് അവരുടെ ജീവിതത്തിലെ ഏറ്റവും പ്രധാനപ്പെട്ട സാമ്പത്തിക തീരുമാനമായിരിക്കും. പ്രത്യേകിച്ച് നിങ്ങൾ നേരത്തെയുള്ള റിട്ടയർമെൻ്റാണ് ആഗ്രഹിക്കുന്നതെങ്കിൽ ശ്രദ്ധാപൂർവ്വം ആസൂത്രണം ചെയ്യേണ്ടത് അനിവാര്യമാണ്. മ്യൂച്വൽ ഫണ്ടുകളെ മികച്ച രീതിയിൽ ഉപയോഗപ്പെടുത്തുന്നതിലൂടെ നിങ്ങൾക്ക് സുഖകരമായ റിട്ടയർമെൻ്റ് ജീവിതം നയിക്കാനാകും. റിട്ടയർമെന്റ് ആസൂത്രണത്തിൽ മ്യൂച്വൽ ഫണ്ടുകളുടെ പങ്ക് വ്യക്തമായി മനസ്സിലാക്കുവാൻ ശ്രമിക്കാം.
കഴിയാവുന്നത്ര നേരത്തെ നിക്ഷേപിക്കുവാൻ തുടങ്ങുക
നിങ്ങൾ നേരത്തെ നിക്ഷേപിക്കുവാൻ തുടങ്ങുമ്പോൾ നിങ്ങളുടെ പണത്തിന് വളരുവാൻ സഹായകരമാകുന്ന കൂടുതൽ സമയം ലഭിക്കുകയാണ് ചെയ്യുന്നത്. നിങ്ങളുടെ പണം കൂടുതൽ കാലം നിക്ഷേപിക്കപ്പെടുമ്പോൾ അതിനനുസരിച്ച് കോമ്പൗണ്ടിംഗിന്റെ ഗുണഫലം നേടുവാൻ നിങ്ങൾക്ക് സാധിക്കുന്നു.
നിക്ഷേപത്തിലൂടെ നിങ്ങൾക്ക് ലഭിക്കുന്ന നേട്ടം കൂടുതൽ നേട്ടം നേടുവാൻ നിങ്ങളെ സഹായിക്കുന്നതിനേയാണ് കോമ്പൗണ്ടിംഗ് എന്ന് പറയുന്നത്. വളരെ ചെറിയ നിക്ഷേപമാണ് നിങ്ങൾ നടത്തുന്നതെങ്കിലും തുടർച്ചയായി നിങ്ങൾക്ക് നിക്ഷേപിക്കുവാൻ കഴിയുകയാണെങ്കിൽ റിട്ടയർമെൻ്റ് കാലഘട്ടം എത്തുമ്പോൾ ഒരു വലിയ തുക തന്നെ കണ്ടെത്തുവാൻ നിങ്ങൾക്ക് കഴിയും.
നേരത്തെ നിക്ഷേപം ആരംഭിക്കുന്നവർക്ക് കൂടുതൽ റിസ്ക്കെടുത്തു കൊണ്ട് ഉയർന്ന ലാഭ സാധ്യതയുള്ള ഫണ്ടുകളിൽ നിക്ഷേപിക്കുവാനുള്ള സാഹചര്യം ഉണ്ടായിരിക്കും. നിങ്ങൾ നിങ്ങളുടെ റിട്ടയർമെൻ്റിലേക്ക് എത്തിച്ചേരുന്ന കാലഘട്ടമാകുമ്പോൾ ഈ നിക്ഷേപങ്ങൾ താരതമ്യേന സുരക്ഷിതമായ ഫണ്ടുകളിലേക്ക് മാറ്റാവുന്നതാണ്.
തുടർച്ചയായ നിക്ഷേപം
മ്യൂച്വൽ ഫണ്ട് നിക്ഷേപത്തിലൂടെ നിങ്ങൾക്ക് ആസ്തികൾ സൃഷ്ടിക്കണമെങ്കിൽ തുടർച്ചയായി നിക്ഷേപിക്കാൻ ശ്രമിക്കുക. എസ് ഐ പി അഥവാ സിസ്റ്റമാറ്റിക് ഇൻവെസ്റ്റ്മെൻറ് പ്ലാൻ രീതി പിന്തുടരുന്നതിലൂടെ നിങ്ങൾക്ക് തുടർച്ചയായ നിക്ഷേപം ഉറപ്പുവരുത്തുവാൻ സാധിക്കും.
എല്ലാ മാസവും ഒരു മാസത്തിൽ രണ്ടുതവണ മൂന്നുമാസം കൂടുമ്പോൾ എന്നിങ്ങനെ നിക്ഷേപകന്റെ ഇഷ്ടാനുസരണം നിശ്ചിത കാലാവധിയിൽ നിക്ഷേപം ആവർത്തിക്കുന്ന രീതിയാണ് സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ. വിപണിയിൽ നിലവിലുള്ള സാഹചര്യം എന്തുതന്നെയായാലും അച്ചടക്കത്തോടുകൂടിയുള്ള ഈ നിക്ഷേപരീതി ഒരു മികച്ച പോർട്ട്ഫോളിയോ സൃഷ്ടിച്ചെടുക്കുവാൻ നിങ്ങളെ സഹായിക്കുന്നു.
വളരെ ചെറിയ തുകയാണ് നിങ്ങൾക്ക് മാറ്റിവെക്കാൻ സാധിക്കുന്നതെങ്കിൽ പോലും മടിക്കാതെ നിക്ഷേപിക്കാനായി മുന്നിട്ടിറങ്ങുക. നിങ്ങൾക്ക് നിക്ഷേപം ആരംഭിക്കുവാൻ വലിയ തുക വേണമെന്ന് വാശിപിടിക്കുന്നതിൽ അർത്ഥമില്ല. നിങ്ങൾ ജോലിയിൽ പ്രവേശിക്കുന്ന യൗവ്വന കാലഘട്ടത്തിൽ തന്നെ വളരെ പ്രാധാന്യത്തോടെ വേണം നിക്ഷേപങ്ങളെ നോക്കികാണുവാൻ. തുടർച്ചയായി മ്യൂച്വൽ ഫണ്ടുകളിൽ നിക്ഷേപം നടത്തുക വഴി വിപണിയിൽ ഉണ്ടാകുന്ന വളർച്ചയുടെ ഗുണഫലം നേടുവാനുള്ള അവസരമാണ് നിങ്ങൾക്ക് ലഭിക്കുന്നത്.
വ്യത്യസ്ത ആസ്തികളിലായി നിക്ഷേപിക്കുക
നിങ്ങളുടെ റിട്ടയർമെൻ്റ് പദ്ധതിയുടെ ഭാഗമായി മ്യൂച്വൽ ഫണ്ട് നിക്ഷേപത്തെ മികച്ച രീതിയിൽ ഉപയോഗപ്പെടുത്തണമെങ്കിൽ വ്യത്യസ്ത ആസ്തികളിലായി നിക്ഷേപം വ്യാപിപ്പിക്കുവാൻ കഴിയണം. ഓഹരികൾ, ബോണ്ടുകൾ, ബാലൻസ്ഡ് ഫണ്ടുകൾ തുടങ്ങി വ്യത്യസ്ത സ്വഭാവമുള്ള ആസ്തികൾ നിങ്ങളുടെ പോർട്ട്ഫോളിയോയിൽ ഉൾപ്പെടുത്തുക.
നിങ്ങളുടെ പ്രായമാണ് പരിഗണിക്കേണ്ട മറ്റൊരു പ്രധാനപ്പെട്ട ഘടകം. യുവാക്കളായ നിക്ഷേപകർക്ക് റിട്ടയർമെൻ്റിന് കൂടുതൽ സമയം ഉള്ളതിനാൽ തന്നെ ഉയർന്ന റിസ്ക്കുള്ള നിക്ഷേപങ്ങൾ നടത്തുവാൻ സാധിക്കും. ഉദാഹരണത്തിന് ഓഹരി അധിഷ്ഠിതമായ ഫണ്ടുകളുടെ നിക്ഷേപത്തിൽ ഉയർന്ന റിസ്ക് നിലനിൽക്കുന്നുണ്ടെങ്കിലും അവയിൽ നിന്ന് ലാഭം ലഭിക്കുവാനുള്ള സാധ്യത കൂടുതലാണ്. നിങ്ങളുടെ റിട്ടയർമെന്റിലേക്കുള്ള നീക്കിയിരിപ്പിന് കൂടുതൽ വളർച്ച നൽകുവാൻ ഇക്ക്വിറ്റി ഫണ്ടുകൾക്ക് ശേഷിയുണ്ട്.
നിങ്ങൾ നിങ്ങളുടെ റിട്ടയർമെൻ്റിലേക്ക് അടുക്കുമ്പോൾ നിക്ഷേപത്തിന്റെ സുരക്ഷിതത്വത്തിന് ആയിരിക്കും കൂടുതൽ പ്രാധാന്യം നൽകുന്നുണ്ടാവുക. ഇത്തരം സാഹചര്യങ്ങളിൽ ഡെറ്റ് ഫണ്ടുകളെ ആശ്രയിക്കുന്നതായിരിക്കും അഭികാമ്യം. ഡെറ്റ് ഫണ്ടുകൾ സ്ഥിരതയാർന്ന നേട്ടം നൽകുന്ന താരതമ്യേന സുരക്ഷിതമായ നിക്ഷേപമാർഗമാണ്.
മറ്റൊരു മികച്ച അവസരമാണ് ബാലൻസ്ഡ് ഫണ്ടുകൾ. ഓഹരികൾക്കൊപ്പം ബോണ്ടുകളും ഇത്തരം ഫണ്ടുകളുടെ ഭാഗമായിരിക്കും. റിട്ടയർമെൻ്റുമായി ബന്ധപ്പെട്ട നിങ്ങളുടെ ലക്ഷ്യങ്ങളിൽ മാറ്റമുണ്ടാകുന്നതിനനുസരിച്ച് നിക്ഷേപിക്കുന്ന ഫണ്ടുകളിൽ മാറ്റം വരുത്താവുന്നതാണ്.
പോർട്ട്ഫോളിയോ റീബാലൻസ് ചെയ്യുക
ജീവിത സാഹചര്യങ്ങൾക്കൊപ്പം സാമ്പത്തികമായ ആവശ്യങ്ങൾക്കും എപ്പോഴും മാറ്റങ്ങൾ സംഭവിച്ചുകൊണ്ടിരിക്കും. ജീവിതത്തിലെ വ്യത്യസ്ത കാലഘട്ടങ്ങളിലൂടെ കടന്നു പോകുമ്പോൾ നിങ്ങളുടെ ലക്ഷ്യങ്ങളിൽ മാറ്റങ്ങൾ വരുത്തേണ്ടി വന്നേക്കാം. അതുകൊണ്ട് നിക്ഷേപങ്ങളെ തുടർച്ചയായ വിലയിരുത്തലുകൾക്ക് വിധേയമാക്കുക.
വിവാഹം, കുട്ടികൾ, പുതിയ ജോലി തുടങ്ങി നിങ്ങളുടെ വ്യക്തി ജീവിതത്തിൽ സംഭവിക്കുന്ന ഓരോ മാറ്റങ്ങളും നിങ്ങളുടെ സാമ്പത്തിക ലക്ഷ്യങ്ങളെ സ്വാധീനിക്കുന്ന ഘടകങ്ങളാണ്. ഈ മാറ്റങ്ങൾക്ക് അനുസരിച്ച് നിങ്ങളുടെ പോർട്ട്ഫോളിയോയും പരിഷ്കരിക്കേണ്ടതായി വന്നേക്കാം.
നിങ്ങളുടെ മ്യൂച്വൽ ഫണ്ട് നിക്ഷേപങ്ങൾ നിങ്ങളുടെ റിട്ടയർമെൻ്റുമായി ബന്ധപ്പെട്ട ലക്ഷ്യങ്ങൾ നിറവേറ്റുവാൻ പര്യാപ്തമാണെന്ന് ഉറപ്പു വരുത്തുക. ഉദാഹരണത്തിന് നിങ്ങൾ നിങ്ങളുടെ യൗവ്വന കാലഘട്ടത്തിൽ നിക്ഷേപം ആരംഭിക്കുമ്പോൾ ഇക്വിറ്റി ഫണ്ടുകളിലായിരിക്കാം കൂടുതൽ നിക്ഷേപം നടത്തിയിട്ടുണ്ടാവുക. എന്നാൽ റിട്ടയർമെൻ്റിലേക്ക് അടുക്കുമ്പോൾ നിക്ഷേപത്തിന്റെ സുരക്ഷിതത്വത്തിന് കൂടുതൽ പ്രാധാന്യം നൽകേണ്ടതിനാൽ കൂടുതൽ സുരക്ഷിതമായ നിക്ഷേപ മാർഗങ്ങളിലേക്ക് നിക്ഷേപം മാറ്റുന്നതായിരിക്കും അഭികാമ്യം.
നികുതി ആസൂത്രണം ചെയ്യുക
മ്യൂച്വൽ ഫണ്ട് നിക്ഷേപത്തിൽ നിന്നും പരമാവധി നേട്ടം ലഭിക്കണമെങ്കിൽ നികുതി കൃത്യമായി ആസൂത്രണം ചെയ്യേണ്ടതുണ്ട്. ശരിയായ ഫണ്ടുകൾ തിരഞ്ഞെടുക്കുവാനും സാമ്പത്തിക കാര്യങ്ങൾ മികച്ച രീതിയിൽ കൈകാര്യം ചെയ്യുവാനും സാധിക്കണം. അതിലൂടെ മാത്രമേ പരമാവധി നേട്ടം നേടുവാനും സാമ്പത്തിക ലക്ഷ്യങ്ങൾ കാര്യക്ഷമമായി കൈവരിക്കുവാനും സാധിക്കുകയുള്ളൂ.
Are you looking for investments?
Kashly team can help you start your mutual fund investments with the right assistance. signup here
പബ്ലിക് പ്രൊവിഡന്റ് ഫണ്ട് (പി പി എഫ് ), നാഷണൽ പെൻഷൻ സിസ്റ്റം ( എൻ പി എസ് ), എംപ്ലോയീസ് പ്രൊവിഡന്റ് ഫണ്ട് ( ഇ പി എഫ് ), ഇക്വിറ്റി ലിങ്ക്ഡ് സേവിംഗ്സ് സ്കീം ( ഇ എൽ എസ് എസ് )തുടങ്ങി നികുതി ഇളവ് ലഭ്യമാകുന്ന നിക്ഷേപ മാർഗങ്ങൾ തിരഞ്ഞെടുക്കുക.
പി പി എഫ്, എൻ പി എസ്, ഇ പി എഫ് മുതലായ സ്കീമുകളിലെ നിക്ഷേപത്തിന് ഇൻകം ടാക്സ് ആക്ട് സെക്ഷൻ 80 C പ്രകാരം നികുതിയിളവ് ലഭിക്കുന്നുണ്ട്. ഇ എൽ എസ് എസ് ഫണ്ടുകളിലെ നിക്ഷേപം നികുതിയിളവിനൊപ്പം ഉയർന്ന വളർച്ച നൽകുന്നതാണ്.
സംഗ്രഹം
നിങ്ങളുടെ റിട്ടയർമെൻ്റ് ജീവിതത്തിന് സാമ്പത്തിക സുരക്ഷിതത്വം നൽകുവാൻ മ്യൂച്വൽ ഫണ്ടുകളെ മികച്ച രീതിയിൽ ഉപയോഗപ്പെടുത്താവുന്നതാണ്. പണം വളർത്തുവാനും, നിങ്ങളുടെ സമ്പത്തിന്റെ മൂല്യം സുരക്ഷിതമായി നിലനിർത്തുവാനും മ്യൂച്വൽ ഫണ്ടുകൾ നിങ്ങളെ സഹായിക്കുന്നു. ശരിയായ ഫണ്ടുകൾ തിരഞ്ഞെടുത്തു കൊണ്ട് അച്ചടക്കമുള്ള ഒരു നിക്ഷേപ പദ്ധതി ആവിഷ്കരിക്കുന്നതിലൂടെ ആയാസരഹിതമായ ഒരു റിട്ടയർമെൻ്റ് ജീവിതത്തിന് അടിത്തറ പാകുവാൻ നിങ്ങൾക്ക് സാധിക്കും.
